17 January 1646.
Quartering souldieris.
It is statut and ordanit that the baylyies pay the haill honest people in
the toune for quartering of the souldieris (the comanders being acceptit) of
all who hes beine quarterit heir since livetennent generall David Leslie with
his troupes went af the toune, and that out of the excyse or ony vther money
they have belonging to the toune, for the space of twentie dayes or farder as
they think convenient and the tounes money will extend to.
7 [February] 1646.
Magasine.
Thomas Broune and Robert Mack ar appoyntit to have the charge of the
magaseine, and that the haill pouldir in toune, ball and vtheris armes and
ammunitioune, be brought in to the tolbuith and put in ther keippeing vpon
ther noitts of recaite, to be furthcomand ather for the pryce or delyverie
therof, for the quhilk they ar to be comptable to the counsell, and the counsell
to pay that quhilk sall be imployit for the publick vse of the toune incaise
the inhabitantis, recaveris therof, may not pay; and ordanis them to provyd
and munt the armes they have with all possible speide.
14 February 1646.
Clerk to the sessioune an singer.
Ordaines the magistratis, with the deane of gild, deacon conveinar, James
Stewart, William Lychtbodie, Thomas Allane and William Coitts, to meit
with the ministeris on Mononday nixt at tua houris efter noone anent the
settilling of the clerk to the sessioune and ane singeris place.
Forraine malt.
Ordaines intimatioune to be maid, be touck of drum, on Weddinsday
nixt, that no forraine malt be sold bot in oppine mercat and at the ordiner
place, vnder the paine of confiscatioune.
Conynghame water serjand.
Mathow Conynghame, merchand, wpon his supplicatioune to the counsell,
being lyttit with John Wilsoun and Androw Findlay anent the office of water
sergandschip now vacand, the said Mathow be pluralitie of voitts is electit to
the said place.
21 February 1646.
Bunteine vnlawit.
Francis Bunteine, nottar, is vnlawit in fourtie punds for his miscariage
in judgement some few weiks since and to remaine in waird during the
magistrats pleasour, and the vnlaw to be dispoisit vpon be the magistratis at
ther pleasour. Nota, that that for quhilk Francis was chalancit was that
he said to the baylyies, sittand in jugement, that he wald anger the best of
thame, and if they wer out of judgment, that he wald tell thame ane vther tell;
quhilk he confessit to be trew and cam in the counsells will for his fault,
wha vnlawit as said is.
Warrant.
Ordaines the thesaurer to pay to John Grahame the soume of four scoire
nyne pund vj s., debursit be him for the clerks and his awine chearges fyfteine
dayes in going to St. Andrews, remaineing ther and returning, and ther
horses hyre, and for ane stand of cloithes to the post, and for ane dayes
chearges to John Grahame in going to Dumbartane to Major Wood at the
desyr of the counsell.
28 February 1646.
Jonsonis money.
Anent Jonsonis money, ordaines William Yaire to try of James Bell, lait
proveist, how it hes beine impendit or quher it is and to report the nixt weick.
Bridge.
Anent the bridge mending, it is ordanit that the maister of wark caus
leid stones thervnto and report his diligence the nixt weick.
Kirk.
Anent the kirk, it is ordanit that Mathow Colquhoun compleit the leid
of the laiche steiple and the rest therof.
11 March 1646.
Clark send to Edinburgh.
Mr. John Spreule, clark, is ordanit to ryd to Edinburgh with ane ansuer
of the letter direct heire be the committee of estaitis for outputting of the
draguneris craved be thame.
14 March 1646.
Warrand, claingeris.
Ordaines the thesaurer to pay to the maister of wark jc X li. money
debursit be him to the cleangeris the tym they wer cleining the foull houssis
and people in toune.
24 March 1646.
Money.
It is ordanit that ther be 500 lib. sterling advancit to the officeris of
Baylyies regiment lying in toune, they alwayes giving retentioune and allowance of ther haill quarteris and of ther horses quarteris conform to compt and
reckoning.
28 March 1646.
Armes.
It is ordanit that all the armes lent furth of the tolbuith be brought in
and diligence to be reportit the nixt weick.
Visitatioun, grammer scooll.
Ordaines the baylyies, dean of gild, deacon conveinar and vtheris they
please, to attend the visitatioun of the Gramer School and to report.
16 April 1646.
Gres sett.
[Grass of Skellingsmyre set for £11; Sheep Craigs, £8; Quarrell Hill, £20; Somerhill and Lone, £3; lands near Flemingtoun, £40.]
18 April 1646.
Nicolsone, advocat.
In regaird that Sir Thomas Nicolsoune, ane of the tounes advocats, is
depairtit this lyf, and that it is necessar that ane be maid choyse of in his
roume, thairfoir they have nominat, admittit and presentit, and nominatis,
admitis and presentis Mr. Thomas Nicolsoune to be their advocat in place
of the said vmquhill Sir Thomas; and gives, grants, and dispones to him the
said office and ordiner pensioune dew thervnto during the counsells pleasour;
and ordaines the thesaurer to send him ten pund.
Swordis.
Thomas Broun producit and laid vp 54 suords quhilk wer givine out to
be dressit, and declarit he had debursit 40 s. for the dressing of the peice
of them, inde jc viij lib., quhilk the thesaurer is ordanit to pay.
Johnesone, commissionar
Ordains John Jonstoun to go to the presbyterie of Lanerk and get
ansuer from them anent ther sending men or moneys to hyre men to work
at the trinch; as als ordains to writ to the rest of the presbyteries for ther
deficiencie and to report diligence.
25 April 1646.
Warrand.
Ordaines the thesaurer to pay to Daniell Broun, chyrurgian, twelf punds
money for the helping and curing of certaine poore sojouris hurt at Kilsyth,
at command of the lait magistrats.
Warrand.
Ordaines the thesaurer to pay to Thomas Broun threttie pund iiij d.
quhilk he debursit for sundrie particularis spent with the officeris of Livetennent Generall Baylyies regiment quhen they wer maid burgessis.
9 May 1646.
Wark at the trinches.
Ordanis the haill inhabitantis of this brughe to com out, ilk Mononday
of the weick, to the works, and to begin on Mononday nixt, and ilk maister
of families to provyd materialls necessar for ther servands therin; and these
who comes not out bot neglectis the same sall be counttit disaffectit to the
caus in hand and punischit be the subgovernour according to the will of the
magistratis; and ordains publicatioun to be maid heirof be touck of drum;
and for this end, quhill the work be finischit, ordains the exerceisise quhilk
was vsit to be on the Mononday to be changit to Weddingsday and ane note
heireof sent to ilk minister to maik publicatioun therof out of pulpet and to
exhort the people to the work and to be present thameselfs.
Provest commissionar.
The proveist is ordanit to go to Edinburgh as commissioner for the
toune to attend anent the ropping of the excyse, and als appoyntit and
ellecttit commissionar to the nixt generall assemblie, and ordaines ane commissioun to be grantit to him for that effect, and attend all vther business
concerns the toune; and als to remonstrat to the commissioun of the kirk
the refuissall maid be Mr. Edward Wricht to preitch ilk foirnoone of Sabath
day in the Blackfreir Kirk and ilk efter noone in the Hie Kirk.
19 May 1646.
Common good set.
[Common good set for a year as follows:—Mills, 8500 merks; ladles, 2800 merks;
meal market and pecks, 600 merks; tron, 780 merks; bridge, 500 merks.]
21 May 1646.
Mentinance and excise.
In regaird that the roll of the monethlie mentinence is closit, it is
ordanit that the proveist and thrie baylyies [and others] wha sall in ther
severall quarteris pay to the inhabitantis out of the first end of the excyse
the quarteris of ther souldieris that hes lyene vpon thame of the regimentis
now in toune, rebaitting alwayes their monethlie mentinance af the first end,
and efter compt and payment ordaines that they sall give in ther compt of
ther haill intromissioune baith for the prior sax moneths mentinance and
excyse debursed and these sax moneths now to be debursed, and ordaines
John Grahame to furneise the money out of the excyse in his hand.
23 May 1646.
Act in favouris of the deane of gild and his bretherine.
The proveist, baylyies and counsell, being convenit as said is, ordaines
that the deane of gild of this brughe, his bretherine of counsell and ther
clerk, sall be defendit be the laweris, vpon the tounes chairges, for keipping
them frie of all inconveniences they can fall in be law anent pronunceing
sentence in the caus persewit be Capitane Mathow Colquhoune against
William Stewart, in regaird they have done nothing therin bot according to
the resolutiouns givine them be the tounes advocatis.
26 May 1646.
Commissioun.
The foirsaid Thomas Allane is nominat and electit to repaire to Dumbartane, and ther to agrie with them anent the bargane of tobacco brought
in be strangeris for the behuif of baith the brughes.
6 June 1646.
Commissioun, outreick.
It is ordanit ane compt be sought of the money gathered for the
outreick of these men went to St. Johnstoun. Robert Hammiltoun is
choisine to Lanerk anent the outreick sent to St. Johnstoun and report
his diligence.
16 June 1646.
Port.
It is inactit and ordanit that, with all expeditioun, ther be ane port
buildit beyond the Gallowgait burne ansuerable to the cast of the trinche in
that place, and Niniane Gilhagie and William Lychtbodie to set the work
on task.
20 June 1646.
Bridgewark.
Thomas Allane is appoynted to attend the bridgwark this weik.
Commissionar, Andersouno.
Niniane Andersone, James Stewart and Androw Cunynghame, being
lytted to go as commissionar for the toune to the conventioun of burrowes, to
be haldin at Perth, vpon this provisione that if the proveist can accept that
he sall be the commissionar and a commission to be sent to him, and so
therefter the said Niniane Andersoune was ellectit and Niniane Gilhagie,
deacon conveinar, to be accessorie to him.
13 July 1646.
Warrand, ports, Ker.
Ordaines the thesaurer to pay John Boyd fourtie punds for the bigging
of West Port; item, to John Hunter for the Eist Port, threttie pund; item
debursit be him quhen Livetennent collonell Ker was maid burges and for
four horses hyre to him, tuentie four pund.
Hutchesone.
Ordaines David Huchesoune to have place in Huchesouns Hospitall, both
in regard of his povertie, old edge, and nearest of kine to the fundatouris of
that hospitall.
14 July 1646.
Provest, conmissionar.
The proveist is maid choyce of to go to Edinburgh anent the summondis
givine to the tounes people for complyeance with the enemie to supplicat
that they may be examinat heire.
1 August 1646.
Muscatis.
Ordaines the thesaurer to give David Logan tuentie four pund for dressing of muscatis to the regiment.
8 August 1646.
Tounehorssis.
Ordanis that the magistratis tack vp ane list of the haill horses in the
toune and caus ane competent number of them serve weicklie at the trinche,
for quhilk service the people, awneris of the horses, ar to be frie of watching
and service at the trinche.
Scotisschools.
Ordanis the schoolmaisteris of the Scotis schools to be warnit to the nixt
meitting.
21 August 1646.
Drawin teyndis sett.
The drawine teyndis ar sett to William Stewart for the soume of thretteine hundreth merkis money.
29 August 1646.
Live-Col. Ker.
Thomas Broune gave in ane compt for wyne, confectionis and vtheris,
furneischit quhen Live-Colonel Ker and vtheris wer maid burgesses, extending
to threttein pund iiij s., quhilk was allowit.
5 September 1646.
Pickis.
Ordanis the thesaurer to give to Niniane Gilhagie tua hundreth punds
quhairwith to buy ane hundreth and four picks to be laid vp in the tounes
magasene.
12 September 1646.
Provest, commissionar.
The proveist is electit commissioner to go to Edinburgh to petitioun the
estaitis anent the maner of the electioune of the magistratis and counsell this
yeire, and maister John Spreule to go with him.
Act in favours of Cant.
Anent John Cant, musician, it is inactit, concludit and agriet that the
proveist, baylyies and thair successouris in office, sall pay to him yeerlie for the
space of fyve yeiris efter Whitsounday last, quhilk was his entrie, for to raise
the psalmes in the Hie Kirk on the Saboth and in the Blackfreiris at the weick
sermones, and for keippeing of ane musick schoole, fourtie punds money. And
with all recomends him to the kirk sessioune that he get the eight scoire merks,
yeirlie the saids fyve yeiris, vsit to be payit of befoire to James Sanderis, with
fourtie merks farder quhairvnto they by thir presentis present him, he alwayes
teaching the tounes bairnes vocall musick for threttie schillings in the quarter
and both vocall and instrumentall musick for fourtie schillings ilk quarter.
Warrand.
Robert Muir is ordanit to get fyve pund ten schilling for dressing of the
gardineris drumes quhilks wer brokine in the tounis service.
19 September 1646.
Money take out of kist.
It is ordanit that ane thowsand punds be taiken out of the money that
lyes in the tolbuith to help to pay the quartering of the sojuris.
Warrand.
Ordanis the thesaurer to pay to John Neisbit tuelf punds for home
bringing of some picks to the toune out of Edinburgh and for vther things he
debursit thair.
28 September 1646.
Proclamatioun.
They, considering that the tym of the ordinar election of thair successouris, magistratis and counsell of this brughe, for the yeire insewing, is now
approtching, for preventing of all disorderlie courses, vther mistackis and
prejudices quhatsomever that thair or thairanent may or can aryse, have
concludit, statut and ordanit that the act of the committee of estaitis
tuching the said election, beiring dait the nyntein of September instant,
be insert and registrat in the toune counsell buicks and als be publischit
and intimat at the mercat croce and that coppies thairof be left and affixt
thairon, to the effect that nane pretend ignorance, quhairof the tenour
followis:—At Edinburgh the 19 of September 1646. The committee of
estaitis, considering that some difference may arise anent the electioun
of the magistratis of Glasgow, by occasioun of ane act of the committee
of the nynt of September instant, wherin there may be some mistakis,
the removing and setling quhairof will be most proper to the parliament,
have therfore thocht fitt to remit the determinatioun therof to the estaits of
parliament; and in the meantyme continues the electioun of the magistratis
of the brughe of Glasgow for the ensewing yeere till the nixt sessioun of
parliament and ay and whill the parliament or some having warrand from
them for that purpose give new orderis theranent, and that the present
magistratis continue in thair offices till that tyme nochtwithstanding of
the said act of the nynt of September; and it is declairit [this] sall be
without prejudice of the priviledges of the said brughe in thair electioun
in tyme cuming.
3 October 1646.
Commissioun, electione.
Ordanis Gabriell and Androw Cunynghame and the clerk to attend on
Thysday nixt at the Castell gait of Glasgow, with the committee of estaitis
their act, to intimat the same to the Deucks commissionaris, if any be, and
report to be maid therof.
Warrand, cleyngeris.
Ordanis the thesaurer to have ane warrand for the soume of fyftie four
pund iij. s. ij d. debursit be him to the cleyngeris and for help and supplie of
the pour folks that are closit vp and for vtheris particularis contenit in the
compt.
6 October 1646.
Elections.
The quhilk day, being the ordinar day of the electioune of the magistratis of this brugh of Glasgow, they did conveine in the tolbuithe therof the
proveist, bailyeis and counsell, quha did beir office within the samen the yeir
immediatlie preceiding Michaelmas 1645, viz. . . . and withe thame
Williame Howie, Niniane Patersone and Johne Clerk, somtyme thesaurers of
the said brught, with thir persounes eftirnamet quha hes borne office and
does now beir office as deikins of craft within the samen, viz. . . . and
ther, in presens of the haill foirnameit persones, the said James Bell produceit
ane act of the committee of estaites grantit for electioune of the magistratis
and counsell of this brught the yeir ensewing, beiring daite the nynt day of
September last bypast, quherof the tennor followes:—At Edinburgh the nynt
day of September 1646 yeirs. Forsameikill as the committie of estaites being
petitioned be the magistratis and tradismen of the towne of Glasgow that since
it was promised to thame be the committie that the last nominatioune of the
magistratis should be without prejudice of their rycht and priviledge of electioune in tyme comeing, that therfore the counsell and magistratis for this
ensewing yeir might be chosen be such as in the ordinar way of electione have
had chairge formerlie; and the committie being willing that the borrowes
should still injoy quhat priviledge the law allowes to thame in the electioune of
their magistratis, and als haveing a regard to thes men put in the last yeir be
the comittee, have thocht fitt that some joynt course be taken at this tyme
that therby they may fall into their awn rycht and priviledge for the tyme to
and therfore ordanes that the present magistratis and counsell of
Glasgow, and thes that war magistratis and counsellors the yeir preceiding,
and als all suche persones within the toune as are yit on lyfe and have at any
tyme heirtofoire bein proveist, bailyeis, deane of gild or thesaurers of that
towne or deikins of craft, shall meit togidder at the tyme of electioune, and
all or maist pairt of thame make choise of the counsell and magistratis for the
yeir to come; and the committie of estates recomendes to thame to mak choice
of George Porterfeild to be proveist, and that they may mak choice of abill
and weill affectit men for the wther places of chairge within the towne; and
it is heirby declared that this act is without prejudice of the priviledge of
electioune dew to the brught in tyme comeing and to ony rycht the Duk of
Lennox hes therin, and als without prejudice of ony censure, civill or ecclesiastical, quherwnto ony persoune within the toune of Glasgow can be lyable
in law for ther cariage towards the rebells. Eftir the reiding quherof it was
found be ane executioune subscrivit be William Rid, messour, that the samen
act wes lawfullie intimat at the croce of the said brught wpon the fyft day of
this instant, and that he did ther mak publict warneing and intimatioune to
George Porterfeild and Robert Hamiltone, Niniane Andersone and Peter
Jonstoune, and wtheris quha bare office as proveist and bailyeis within this
brught the yeir immediatly preceiding, to compeir this day and place,
eftir sermon, to give ther voyce anent the electioune of the magistratis
and counsell therof the yeir ensewing, conforme to the tennor of the said
act of the committie of estates grantit to that effect. And they being
all, this day and place, efter sermon, deuly called wpon by name, out
at the tolbuithe window, to the effect forsaid; as also it being deuly
and legallie verefied be the officers of the said brugh that the foirsaid
proveist, baillies and counsell, quha beare office the yeir immediatlie preceiding, was lawfullie wairned be thame to have compeirit this day, tyme
and place, to the effect foirsaid, and they not compeirand, the haille
foirnameit persones particularly abovenamed, be wertew and warrand of
the forsaid act of the committie of estates before writtin, past on to the
electioune of the proveist and baillyeis of this brugh. [Having made a
leet of three names to be presented to the Duke of Lennox, or his commissioner, in order that one of them might be elected provost, six persons
went therewith to the castle, but not obtaining admittance, they returned
and made report to those who were met in the tolbooth, who thereupon
elected] George Porterfeild to be proveist for the yeir to come. And thane
immediatly thaireftir they directed thir persones of ther number, viz.,
Walter Stirling, Johne Bornes, James Colquhoune, Robert Horner, John
Boyde, to pas to the said George Porterfeild and to signifie to him that he
was elected proveist for the yeir ensewing, and desyred him to come and
accept the said office and chairge and to give his adwyse anent the setting
downe of the lytes of his bailyeis and voice of ther electioune. And the
saids persounes haveing returned back and declaired that he refuised to come
and accept the said chairge and to give his adwyse anent the electioune of
the saids baillies, and they haveing takein instruments therwpon, the haill
foirnameit persounes convenit as said is [elected John Anderson, elder, and
Colein Campbell, merchants, and William Neilsone, craftsman, bailies for the
ensuing year].
9 October 1646.
Council.
[In the absence of George Porterfeild, provost, and those who bore office as bailies
and council for the year immediately preceding, all of whom refused to attend, the
persons mentioned in the act of 6th instant, "some foure onlie exceptit (wha war absent
at mercattis)," elected thirteen merchants and twelve craftsmen to be councillors.]
10 October 1646.
Capitanes, quarter maisters.
Ordaines the captaines on ewerie half quarter of the towne to be
quartermaisters for quartering of sojouris, and ilk ane of thame is to chose
his awin assessor in his owin bounds.
14 October 1646.
Office-bearers.
[The following office-bearers elected in the usual form:—James Hamilton, dean of
guild; Manasses Lyll, deacon-convener; John Andersone, treasurer; Walter Neilson,
visitor of maltmen; Thomas Glen, water bailie; John Louk, master of work.]
Commissioun.
Grantis commissioune to Walter Stirling, Thomas Fyndlar, Johne Millar
and James Rae to goe to the presbiterie on Fryday nixt and present the
supplicatioune subscrivit this day.
17 October 1646.
Huchesoun hospitall.
David Huchesoune, meilman, being knowen kinsman to vmquhill George
and Mr. Thomas Huchesounes, being puire, is ordained to be admitted in
Huchesounes Hospitall, and his entrie to be at the election of the nixt
thesaurer.
Colquhoun assessor.
James Colquhoune is elected assessor to James Hamiltoune, commissioner chosen to the parliament; and ordaines Colein Campbell to ryd and
attend also the townes affaires ther.
31 October 1646.
Deputatior clerk depu
The foirsaidis bailyeis and counsell, wnderstanding that Mr. Harie
Gibsone, ther ordinar clerk, was to repaire to Edinburgh anent the townes
and his awin affaires, and that it is neidfull that ther be ane to suply his
place during his absence for doeing and exercising sick things as is incumbent
be his office and chairge, they therfore doe herby grant full power and
commissioune to Williame Yaire, notar, ther servand, to exerce the said
office in all things quhatsumewer belonging therto, dureing the haill absence
of the clerk, and ay and quhill thir presentis be recalled; and that als frielie
in all things as if ther said ordinar clerk might doe therin if he war present.
Andersone and uthers to ryd to Edinburgh
Ordaines Johne Andersoue and Thomas Morsoune to ryde to Edinburgh
wpon Mononday nixt to attend James Bell anent the townes affaires.
5 November 1646.
Pestilence.
The foirsaidis bailyeis and counsell, fering the plague of pestilence to
encrease in this citie, they therfoire, conforme to the laudable custome
observed of before therintill in ilk exigencie, did mak choyce of the persones
following to be quartermaisteris in the severall bounds beneathe designit,
and ordanes thame to tak wp the names of ewerie familie and to wisit
ewerie familie ilk day and tak notice of ther healthe, to the effect they
may repoirt to the magistratis quher they find any seik persone, viz, . . .
Ordaines intimatioune to be maid be touk of drum that na manner of
persone goe out to the mwir quher the foull persounes are without leive of
the magistratis, and to certifie all thes quho does in the contraire shalbe put
out to the mwir withe the haill families they are in.
7 November 1646.
Warrand, minister.
Ordaines the thesaurer to pay to Mr. Eduard Wricht, minister, thrie
hundrethe merks money in pairt of payment of his stipend quhill the feir be
sett downe.
Collectouris for the poor Hilanders.
Ordaines Allexander Japhray to goe to the Hie Kirke, Johne Walkinshaw
to the Blackfrier Kirk, and Thomas Pollok to the New Kirk, to collect the
morne eftir noone for the Hielanders.
1 December 1646.
Ordinance concerning James Bell and Coline Campbell. (Act of parliament, 1646, c. 31.)
Anent the foure severall suplicatiounes and paper of vindicatioune
respective eftermentioned, given in to the estates of parliament from the
commission of the generall assemblie, the synod of Glasgow, and be the
present magistratis and toun counsell of Glasgow, for themselfis and in
name of the haill incorporatioune and inhabitantis of that toune, as the
suplicatioune affirmes; quhilkis suplicatiounes and paper of vindicatioune
respective beiris as followis, viz., The supplicatioune from the commission
of the generall assemblie relating that it hath bene the insolencie of some
disaffected persones in Glasgow, under censure both civill and ecclesiastick,
not only to protest aganis the act of the committie of estates ordaneing
that nane under censure of kirk and state for complyance with the rebellis
sould be chosen magistrats or counsellouris in burgh, bot utterlie refused
obedience to the said act, and with ane open and hie hand intrudit themselfis in the charge of the said toune, as also have publictlie, and in a
most tumultuous and disorderlie way, disturbed, affronted, and threatned
the presbitrie of Glasgow, and thairfore desyring the parliament to tak into
their serious consideration suche misdemeanouris, and in their wisdome and
justice to censure these wha hes set themselfis up against auctoritie, and
eftir dew tryell of their outrage aganis the presbitrie to punish them
exemplarlie in suche a way as the judicatories of the kirk may reteane
their strenth and auctoritie throughout the land. Item, the suplicatioune of
Mr. Gabriell Maxuell, in name and be direction of the synod of Glasgow,
beirand that the synod had tane tryell of the scandall of some tumultuous
cariage of a multitude of the people of Glasgow aganis the presbitrie thair,
and fand that thair was ane unnecessarie and unordourlie convocatioune of
the multitude of the citie of Glasgow, backing the old magistrats and toune
counsell in face of the presbitrie, led on by Coline Campbell, under pretence
of offering their repentance for their complyance with the enemie, quhairupon
the presbitrie delayed for their answer and discharged anie to come before them
the next dyet bot the old magistrats and toune counsell; notwithstanding
quhairof, the foresaid multitude, backing the old magistrats and toune
counsell, led on by James Bell and Coline Campbell, did thereftir, in a greater
confluence, come before the said presbitrie and insolentlie affront, minas and
upbraid them, sitting in judgment; and the synod considering the foresaid
wrong so avowed and mantained to be of verie evill example and to reflect
aganis kirk judicatories, they did represent it to the parliament to tak
tryell thairof and tak ordour thairwith, as the former laudable lawis of the
kingdome made in favouris of the kirk may not heireftir be despysed and
insolencies of this nature may be preveend, as the supplicatioune mair fullie
proportis. Item, the suplicatioune of the present magistrats and toune
counsell of Glasgow, for themselfis and in name of the haill incorporatioune,
schewing that it had pleased the commission of the kirk and the synodall
assemblie at Glasgow to suffer themselfis to be possest with so muche prejudice against the supplicantis as to owne the civill debates of thair citie as a
matter of so great consequence, wherein they conceave themselfis concerned
to appeare aganis the suplicantis and to suplicat the parliament in thair contrair, quhairof the suplicantis ar exceedinglie grieved, and thairfore appealling
[to] the justice of the parliament and intreating that no interest whatsomevir
nor informatioune from whatsoevir hand weight the suplicants before the
treuth and justice of their cause be fullie understood, wherein they hope to
appeare nothing lyke that their accusers would beare upon them, and
because the suplicantes, their particular concerns, the interes and right of
royall burrowis, and of everie free estate and member in it, desyring thairfore
that the parliament would be pleased to appoint the suplicantis a frie and
unprejudiced hearing before ony farder be proceidit aganis their citie, as this
suplicatioune lykewayis mair fullie beiris. Item, ane fourth suplicatioune
given in be George Porterfeild, in name of the lawful magistrats and counsell
of Glasgow, schewing the pitifull condition of that toune, lyeing in confusion
by the usurpatione of the old magistrats and counsell, under proces for
malignancie before state and kirk, and in danger of greatter inconvenience
daylie incaice the parliament doe not determine the question whether the
election of the suplicantis successouris doeth belong in law to them, or
whither the usurperis, in contempt of state and kirk, sall bruik the office
quhairin they have intruded themselfis, whose insolencie and ryat against
the auctoritie of parliament and ecclesiastick judicatories (if it be not
punished and repesced) the suplicantis who have toyled in the service of
the estate and toune in a extrordinar tyme under the burden of a garisone
sall suffer disgrace and oppression for their good service, and the libertie
of the toune salbe prejudged in the suplicantis persones without their
fault, contrair to the expres subscryved warrandis of the committie of estates
direct to the suplicantis when they undertook that charge, and thairfore
desyring that some small expence of tyme may be made by the parliament
for hearing the suplicantis informatioune given in be them with the foresaid suplicatioune, as the suplicatioune and informatioune foresaid also
proportis at mair lenth. Item, the vindicatioune of the proceidingis of
the commissionaris of the generall assemblie in the matter of Glasgow
from the aspersions of a scandalous paper, togither with their desires
concerning the samen, schewing that some disaffected persones in the
toune of Glasgow eftir all their malignant and tumultuarie cariages at
home have bene so malitious and inconsidered (in the very tyme of the
offer of their repentance to the commissioneris of the generall assemblie)
to loadon the suplicantis with heavie imputatiounes and unjust aspersions,
by a scandaluous paper given in to the parliament, quhairin they challenge
the supplicantis as men possest with prejudices and owneris of civill debates
and suche as have studied to weight them with the suplicantis informations
before the treuth be tryed, and as unfreindis to them and suche as would
prejudicat a frie hearing to them in these thingis that concerns the interest
of royall burrowis and frie estates; as also bearing that the suplicantis
ar perswaded that the parliament and all suche as knaw anie thing of
the suplicantis dewtie and tenders the work of reformatioune will beare
the suplicantis testimonie that hithertillis they have not streitched themselfis beyond their lynes bot walked within the compas of their trust, aimeing
at nothing for themselfis bot studieing the preservatioune of religion and
advanceing the work of reformatioune, and that in the foresaid particular
they had confyned themselfis to the same rule and mynded the same thing,
and that their calling and covenant obleidged them before God to discover
and mak knawne all the adversaries of the treuth and to seik redres of the
evillis and preventing of these dangeris threatned to the caus of God by
malignant practises and to suplicat that open and declared malignantis may
be keipit out of the places of publict trust, and these thingis ar no more then
the servandis of God hes done in all ages and hes evir bene the suplicantis
custome and care, since the Lord restored the kirk to her libertie; as also
that the suplicantis nevir asswmed to themselfis ane judgment ather upon
the civill debates or in the mater of these persones ryot aganis the presbitrie,
bot onlie from their zeale of the work of reformatioune and desire to preserve
the judicatories of the kirk in their integritie and strenth represented the
dangers that these mens practises threattens to bothe and suplicat for redress,
quhilk is a duetie so innocent that it is a wonder that anie sould have been
so bold as to traduce the same, quhilk could not have flowed fra anie bot
from spiritis long sopped in malignancie; and thairfore the commissioneris of
the assemblie, as they renew the desire of their formar suplicatioune concerning these mens cariage, so they trust that their paper sall leave no hard
impression in the hearts of the estates of parliament, bot desires that the
parliament will tak notice thairof, tending muche to the weakning of the
suplicantis handis in the work of God, exposing them to misconstructions
of the people, opening a door to the sclanderers of kirk judicatories, and
tending to raise jealousies, quhilk is one of the maine designes of all the
adversaries of treuth and peace, and quhilk the suplicantis ar confident salbe
no les carefullie shunned by the parliament and the suplicantis bothe then
it is studied by them; and that before the parliament wald so censure this
practise, whiche hath bene hithertillis without paralell, that it be not a
president to inbalme vtheris to hazard upon suche dangerous and presumptuous attemptis aganis the judicatories of the kirk; as the paper of
vindicatioune, subscryvit be Mr. Andro Ker, clerk to the commission of the
generall assemblie, mair fullie proportis. And, fyiftlie, the suplicatioune of the
inhabitantis of the toun of Glasgow, given in to the parliament, schewing
that they are informed that there is some exception takine at their petitions
given in be them to the severall bodies of the estates concerning these papers
wer given in be the kirk aganis them, and thairfore humblie representing
to the parliament that what was done by the suplicantis (quhairin offence
is given) is out of meere ignorance, being unacquent with such affaires, and
that it was nevir the suplicantis intention to charge the kirk as intermeddlers
with civill debates, knawing that what they doe is out of their zeale to the
good caus, and the suplicantis doe begge pardon for their escape, for the
quhilk they ar heartilie sorie and sall give satisfaction as the parliament
sall think expedient, as this suplicatioune in lyke maner beiris. Quhilkis
suplicatiounes and vindicatioune, respective before rehearsed, with the informatioune given in for clearing of the question betwixt the old magistrats
and counsell of Glasgow in anno 1645 and the present laufull magistrats
and counsell, with the ressons for the present magistrats and counselleris of
Glasgow against the election of the new magistratis and counselloris be
vertew of the act of the committie of estates, being all red in audience of
the parliament (eftir that the samen had bene sene be the severall estates
apairt) and the foresaid suplicatiounes, ressones and paper of vindicatioune
respective abonementioned, with the desires of the commissioneris of the
generall assemblie thairintill, being at lenth hard and considered be the
estatis of parliament, they, eftir full debate thairanent, fand that the ingiveris
of the foresaid suplicatioune intitulat—The petition of the present magistratis
and toune counsell of Glasgow for themselfis and in name of the haill incorporatioune—deserved to be censured by imprisonment of thair persones for
these expressions in that suplicatioune, viz.:—That the commission of the
kirk and synodall assemblie at Glasgow had bene pleased to suffer themselfis to be possest with so muche prejudice aganis the suplicantis as to
owne the civill debates of their citie as a matter of so great consequence
quhairin they conceaved themselfis concerned to appear aganis the supplicantis and to supplicat the parliament in thair contrarie. And inrespect
that the suplicatioune is generall, not condiscending upon anie particular
persone or persones thairintill, and that it was affirmed in parliament that
James Bell and Coline Campbell wer the ingivers of the said suplicatioune,
thairfore the estatis of parliament caused call in the saidis James Bell and
Campbell in presens of the parliament, quha, compeiring personally,
acknowledged the ingiving of the suplicatioune and confessed that what they
did thairin was not out of anie misrespect to the commissioneris of the Kirk,
bot out of ignorance, conforme to the foresaid last petition given in by them,
acknowledging the same; quherupon the estates, finding that the saidis James
Bell and Coline Campbell had scandalized the commissioneris of the churche
by these expressions abonementioned contenit in their suplicatioune, the saidis
estates doe thairfore heirby ordain the saidis James Bell and Coline Campbell
to entir their persons in waird within the tolbuith of Edinburgh, their to
remane during the parliamentis pleasure; and therefore they doe heirby give
warrand and ordour to the magistrats of Edinburgh to ressave the saidis
James Bell and Coline Campbell in waird within their said tolbuith, and
to keip and deteane them as prisoneris therintill during the parliamentis
pleasure as said is; quhilk was intimat to the saidis James Bell and Coline
Campbell personally present.
4 December 1646.
Ordinance concerning the toune Glasgow. (Act of parliament, 1646, c.40.)
The estates of parliament haveing hard and considered the suplicatioune
presented to them be George Porterfield, provest of Glasgow, for himselfe
and in name and behalfe of the baillies and counsell therof wha ar continwed
in office and place by warrand of the committie of estatis, they ordaine the
mater contraverted anent the election of the magistratis of the toun of
Glasgow to be hard and decydit publictlie in parliament.
Warrand for liberatioune of James Bell and Coline Campbell. (Act of parliament, 1646, c. 41.)
The estates of parliament, haveing hard the verball relatioune of Mr.
Robert Douglas, in name of the commission of the kirk, schaweing that
James Bell and Colin Campbell had supplicat them and acknowledged their
fault for the quhilk they wer incarcerat in the tolbuith of Edinburgh by
warrand of the parliament, and that thairfore he was desyred from the
commission of the kirk to interceid with the estates of parliament for their
liberatioune, the saidis estates grantis the desire foresaid of the commission
for the kirk and doe heirby give warrand to the magistratis of Edinburgh
and keipar of their tolbuith to put the saidis James Bell and Coline
Campbell to libertie furth therof notwithstanding of the formar warrand for
their incarceration.
5 December 1646.
Lyll and wtheris to ryd to Edinburgh.
Ordaines Manasses Lyll, James Bornes, Thomas Pollok, Walter Neilsone
and Johne Wilsoune to goe to Edinburgh to accompanie the tounes commissioners ther.
Warrand.
Ordaines ane warrand to be giwen to the thesaurer for the soume of thrie
scoir punds money deburst be him in smallis to the Hielanders quhen they
war put of the towne.
12 December 1646.
Hilanderis removit.
Ordaines the Hielanders to be removed of the towne on Monday nixt,
and to give ewerie ane of them some meill for ther supply.
No meittings at lykwalkis.
It is statute and ordanit that na man transport themselvis of the towne
except women and children, and that ther be na meiting at lykwakes nor
after burialls, and that this be intimat be touk of drum.
Taksmen.
Comperit the haill takismen of the mylne, laidells, tron and brig, and
intimat to the councell that in respect of the seiknes and visitatione they
could get nathing of ther deutyes.
26 December 1646.
Act of parliament anent the election of the magistratis of Glasgow (1646, c. 68).
The estates of parliament now conveened in this sext session of the first
trienniall parliament, haveing takine to their consideration the question anent
the election of the magistratis and counsell of the burgh of Glasgow, whiche
ought to have bene made in the moneth of October last and was delayed be
warrand of the committie of estates till the parliament took the same to consideration, doe thairfore find and declare that George Porterfield, provest,
Robert Hammiltoune, Niniane Andersone and Peter Jonstoune, baillies of the
said burgh, Andro Cunynghame, deane of gild, Niniane Gilhagie, deacone conveener, and remanent of the counsellors of the said burghe, continwed in office
till this present session of parliament be the committie of estates, conforme to
thair act September 19, 1646, are the onlie undoubted and laufull magistratis
and counsell of the said burghe, to whome dewlie belongis the election of thair
successoures in office according to use of burgh, and thairfore doe heirby warrand and authorize them to goe on with all convenient diligence and mak the
said election for this present yeir (notwithstanding that the ordinar tyme be
past) off the magistratis and counsell of the said burgh, and alse to mak election of the deane of gild, thesaurer, and uther inferior office beiraris within the
said brugh, according to old use and wont, as the same was accustomed to be
done before the election in anno 1645, with power to the saidis magistratis and
counsell and uther inferior office beirares foresaid to be elected as saidis to discharge their offices within the said burgh respective as they salbe chosine this
present yeir till the first Tuysday eftir Michaelmes next in anno jm vjc fourtie
sevin, with all priviledges and liberties usit and wont, conforme to the old
custome of the said burgh, inhibiting and discharging all others upon quhatsumevir cullour or pretext to trouble or impede them or their successoures
whom they sall elect in the exerceing of thair severall respective offices as
they will answer upon thair perrill. And thir presentis without prejudice of
the Duke of Lennox interest. And ordanis Sir William Cochrane of Cowdoun
to be advertised of the day of the election for the Duke of Lennox interest
foresaid.
31 December 1646.
Committie for Abirdene, Stirling, Glasgow, and others distressed burghis and shyres. (Act of parliament, 1646 c.78.)
The estates of parliament, upon the reading of the supplicatiounes presented to them in the behalfis of the burgh of Abirdene, Stirling, Glasgow
and sherefdome of Pearth, craveing to be relieved or eased of their miserable
and sad condition of the garisone and quarteringis in thair tounes and shyres,
nominatis and appointis the Erle of Southesk and Lord Burghlie, the lairdis of
Hartwodburne and Bargattoune, James Robertsone and John Kennedy, provest
of Air, or ony foure of them, ane being of euerie estate, to consider the foresaidis
suplicatiounes, with the suplicatiounes of all uther distrest burghes and shyres,
and to think and condiscend upon the wayis and remeidis therof, and thereftir
to report the samen with their opinion theranent to the parliament, that therupon the parliament may tak sick course as they sall think fitt, and addis Major
Generall Midletoune to be supernumerarie in the foresaid comittie, and the estatis
addis to the power abonementioned, viz., to heir and fitt the comptis of the foresaid shyres and burghes.