7 February 1673.
Proveist to Edinburgh; anent Provand tyndis.
Appoyntis the proveist to repair to Edinburgh anent the tounes
affaires, and refers to him to doe in that affair relaiting to the few dewties
of the Provand quhilk is now persewed be the earle of Craufurd against
the toune, as he thinkis most fitt and convenient.
1 March 1673.
Ruinous tenement in Briggait to be taikine doune.
The baillies, most pairt of the counsell, sundrie uther gildbrether of
the said burgh, with Robert Boyd, present deacon of the measounes, and
Alexander Eglingtoune, lait deacon of the wrightis, being conveined for
sighting of that hous or tenement on the north syd of the Briggait,
perteining heretabilly, heigh to the aires of umquhill William Brok and
Claud Snodgres, tailyeour, and laigh to Johne Bell, younger, merchand,
and the saidis Claud, at desyre of the said Johne Bell and Claud Snodgras,
both present, in respect the same is verie ruinous and without doubt will
shortly fall, and that theis therin dwelling hes removed therfra in respect
the samyne without danger cannot be possest, and that the said tenement,
being in the hie street, may not only doe prejudice by the fall therof to
theis accidentallie passing by, but also may kill theis who repaires to
the laigh houssis of the samyne; after sighting therof and consideratioune
had theranent, and finding the samyne most lykly to fall and doe skaith
as said is, they all, in one voyce, ordained the samyne to be taken doune,
with all dilligence and conveniencie, be the said Robert Boyd and
Alexander Eglingtoune, upon the proportionall charges of the heritouris
interested therintill, and the said Robert Boyd and Alexander Eglingtoune, after the same is done, to report theranent.
15 March 1673.
It is concluded that no thrugh stones be suffered to be brought
within the Hie Church yaird quhill the counsell give furder order.
Refers to the proveist, and to quhom he pleases to tak with him, to settle
and agrie with ane coachman for serving the toun with haickna choches
the best way they can. (fn. 1)
Expenssis of decreittis.; Fynes of burgessis, etc.
Appoyntis the proveist, baillies, deane of gild, deacon conveiner,
Johne Cauldwall, John Hall, and utheris whom they pleas, to convein
among them selfes and set doune ane rule for the expenssis of pley to be
conteined in the decreitis evictit befor the toune court and deane of gild
court. And to rectifie and set doune the order that burgessis and gildbrether sall pay quhen they ar admittit, and to report.
Band to the bischop.
There was subscrivit ane band in favouris of the archbischop of
Glasgow, conteining the sowme of four hundreth pundis starling, borrowit
be the toune from him, beiring annualrent only fra Witsonday nixt to
come; quhilk sowme is to be receavit be the thesaurer and he to be charged
Act against Barrie.
Anent the complent given in be John Grahame, procuratour fiscall,
and James Fairie, ane of the baillies for his entres against John Barrie,
fleshour, for that the said John did of lait, in ane fensed justice court,
quher the said James Fairie was sittand in judgment, alledge and declar
that the said James was not his judge but his pairtie, in sua far as he had
seduced and suborned the witnessis that wer leading against him in the
caus was then persewit against the said John, in the hous of John Wood,
and had given them drink to sueir against him quhilk he offered to prove;
as the said complent mair fullie proportis. The said John Barrie compeirand in the counsell grantit the said complent and did refer himselfe in the
counsellis will, who after consideratioune had be them theranent did
decerne and ordaine the said John Barrie to pay to the said procuratour
fiscall for the use of the poor the sowme of ane hundreth pundis, and he to
produce his burges tikit that the samyne may be instantly and publictly
riven, by touk of drum, on the heid of the tolbuith stair, and never to be
readmittit or receavit burges and gildbrother of this burgh heirafter, or
beir any office within the same.
5 April 1673.
Proclamatioune anent stoups.
Appoyntis ane proclamatioune to be sent throw the toune dischargeing
all persones, indwellers therein, to mak use of any stoups within the toune
but of such as are sealled with the deane of gildis mark.
Recommendis to the baillies and Johne Cauldwall to consider the
supplicatioune given in be the phisitianes and chyrurgianes and to report.
2 May 1673.
Warrandis, brig, drogs.
Ordaines the thesaurer to have ane warrand for the sowme of ten
pundis starling, payit out to John Clark, measoune, for his paines in
attending the great brig the last year the tyme of the repairing therof.
And for the sowme of sextie ane pundis sextine shilling Scotis deburst to
John Hall, chyrurgiane, for drogs imployed be him on the poor, at command of the magistrat since the secund of October last.
In presens of the proveist, baillies and counsell, compeired Robert
Rae and Johne Cauldwall, twa of the lait baillies of this burgh, as commissionat from the merchand rank within the samyne, and did present to
them ane supplicatioune from the said merchand rank, makand mentioune that they being informed of the archbishop of Glasgow his being
now at court at London is of intentioune to dimitt his office as archbishop
in our Soveraigne Lordis handis; and considering that the whoill citie and
incorporatioune therin hes lived peacablie and quyetly since the said
archbishop his coming to this burgh, throw his cristian cariage and
behaveour towardis them, and by his government with great discretioune
and moderatioune, and fearing if his dimissioune be receavit the samyne
may tend to the great prejudice of this burgh and cuntrie about, and
therfor intreating and desyring the said magistratis and counsell to mak
applicatioune to what persones at court they think most fitt, and in
pairticular his grace the duk of Lauderdaill, by letters or uther correspondance as they sall pleas. . . . (fn. 2)
2 June 1673.
Warrand, Brysoune, coatch man, bellis.
Ordaines Johne Bryssoune to have ane warrand . . . for twa
hundreth markis payit to John Tailyeour, the coatch man, for his first
yeares fiell, conforme to the agriement made with him quhilk is to conteinow during the counsellis will only, and he to have the said twa hundreth
markis accordingly yearly; and for fyftine pundis starling deburst to Mr.
Kervie for tuning the bellis.
In ansuer to the supplicatioune given in be John Barrie, fleshour,
mentiouning he was most sorrow full for his fawlt in utring some expressions against the baillies quhen they wer keeping a justice court, for
quhilk he was fyned be the counsell and his burges tikit riven, and
therfor craving to be readmittit burges and gildbrother of this burgh,
quhilk being takin to consideratioune they ordaine the clarkis to give
him out ane new extract of his burges and gildbrother tikit.
3 June 1673.
[Common good set for a year as follows:—mills, 8,600 merks (besides 50 bolls
ground malt as formerly); ladles, 2,950 merks; mealmarket and pecks, 900 merks;
tron, 1,180 merks; bridge, 1,710 merks.]
9 June 1673.
Ordaines ane contributioune to be gathered throw the toune for releiff
of theis persones taken by the Turkis in that ship callit the Salmond,
conforme to the ordour of the secreit counsell given out theranent, and
appoyntis [two persons for each of the south, west, north, east, and middle
quarters] to collect the said contributioune, and appoyntis them to give a
compt therof after their collectioune.
Conynghame, bailie at Newport.
The proveist made report of his last dilligence at Newport Glasgow,
and that he had appoyntit Mr. William Conynghame to be baillie
there, quhilk was approvine by the counsell, and appoyntis him to get
commissioune subscrivit be the clark for that effect, and the instructiounes
to be sent to him; and ordaines the baillies, deane of gild, deacon conveiner, Johne Cauldwell and Hugh Nisbit to sett doune the said instructiounes.
Ordaines the jylour of the tolbuith to receave fra ilk persone that
is captivat, at his dimissioune furth of the said tolbuith, being put therin
be vertew of captiounes and charges given to the magistratis, ane sufficient
liberatioune or discharge to the said magistratis, or ane discharge of the
debt, quhilk is to be registrat in the toune court bookis, and the liberatiounes and discharges to be delyvered be him to the clarkis, to be keeped
be them in the chamber, befor any of the said persones be liberat, and
quhilkis liberatiounes ar to be wryttin be the clarkis or their servantis
on the parties expenssis.
16 August 1673.
Absentis from the kirk.
Ordaines ane intimatioune to be on Sunday next in the respective
churches that theis who keepes not the kirkis will be most severlie
punished. (fn. 3)
23 August 1673.
Ordaines the thesaurer to have ane warrand for the sowme of twa
hundreth eight pundis nyntine shilling four penneis Scotis, deburst to
Jonet Reid for the tounes denner at the last rouping of the commoune
guidis and quhat was spent on the twentie nyne day of Maij last.
30 August 1673.
Persones appoynted to note the absentis fra the kirk.
Appoyntis [one person for each of the west, south, east, and north
quarters] to goe throw the toune and tak notice of theis who absentis
themselfes fra the kirk.
13 September 1673.
Agriement with the plumber in mending the Hie Church.
Johne Walkinshaw, deane of gild, made report that he had settled
and agried with Nathaniell Whyt, plumber, for taking aff and casting
againe fra heid to foot, twentie thrie caickis of leid aff the Hie Church,
and for casting, melting, and laying them on againe, for quhilk he is to
have ane hundreth rex dollouris for his paines, and the toune to furnish
leid and uther materiellis, quhilk was allowed and approvine be the
30 September 1673.
The proveist, baillies and counsell being conveined, in ansuer to ane
supplicatioune given in befor them be maister Johne Hamiltoune, sone
laufull to umquhill William Hamilton, merchand, burges of this burgh,
cravand to be admittit bibleothecarius in the colledge of Glasgow, as
that place was last occupyed be maister George Pollok who was in possessioune therof, and is now in the tounes handis be dimissioune of the
same be the said maister George Pollok, who was presentit be them therto,
for four yeares space, quherof ther is twa yit to run, they therfor, after
mature advyce and deliberatioune had theranent, hes given and grantit,
and be the tenour heirof gives and grantis to the said maister Johne
Hamiltoune the present vacant place as bibleothecarius in the said
colledge for the said space of twa yeares yit to run, with the haill benefeit
and casualities belonging therto during the said space, and willis and
desyres the principall, professouris, regentis, and maisteris of the said
colledge to admitt and receave him therto, conforme to the mortificatioune
and agriement past betuixt the said colledge and them theranent.
Electioun of the magistratis.
The proveist, baillies and counsell of the said burgh being conveined,
and understanding this day, being the first Twesday after Michaelmas last,
to be the ordinarie day for electing of the magistratis of this burgh for
the enshewing year, and becaus Robert, archbishop of Glasgow, had
grantit licence to the said magistratis and counsell to sett doune a lyt of
thrie persones, out of quhilk lyt the said bishop might choyse one persone
to be proveist of this burgh the said year enshewing, and the haill
merchand rank being divydit in thrie lytis, ilk lytt conteining fyve
persones, the said magistratis and counsell electit furth therof theis thrie
persones, viz., William Andersoune, present proveist, John Walkinshaw
and John Cauldwall, and did direct the said lyt to the Castle of Glasgow,
quher the said archbishop was for the tyme, to be presentit to him be
Peter Gemmill, James Fairie, Johne Johnstoune and George Andersoune,
ane of their ordinarie clarkis, to the effect forsaid; after sighting quherof
he did nominat the said William Andersoune to be proveist of this burgh
for the year enshewing; and the saidis persones with that lyt and nominatioune being returned, the said William Andersoune, sua nominat to be
proveist, did accept the said office in and upon him and gave his oath as
use is. And therafter they past on to the making of the lytis for the
baillies this year to come, and the haill merchand rank who wer to be
lytted, being in number threttin, wer divydit in sex lytis, out of the
quhilk sex lytis theis sex persones wer choysen, to wit, Johne Walkinshaw [and five others], out of quhilk sex ther was twa to be choysen be the
said archbishop to beir office as twa of the baillies of this burgh for the
merchand rank the year enshewing; and the haill tredis who wer to be
lyted, being in number twelfe, wer divydit in thrie lytis, out of the
quhilkis their was theis thrie persones choysen, to wit, James Colhoune
[and two others], that out therof the said archbishop might choyse one to
be the thrid baillie of this burgh for the enshewing year. And accordingly
the said sex persones of the merchand rank, and thrie of the said tradis
rank, being presentit to the said archbishop be Johne Cauldwall, William
Wallace and the said George Andersoune, he did nominat the said John
Walkinshaw and Hugh Nisbit, for the merchand rank, and the said Johne
Hall, for the craftis, to be the thrie baillies of this burgh for the said
year enshewing. And the said nominatiounes and lytis being returned,
the saidis Johne Walkinshaw, Hugh Nisbit and Johne Hall, all present
in counsell, did accept the said offices in and upon them and gave ther
oathes de fideli administratione therintill as use is.
3 October 1673.
[The magistrates of this and the two preceding years chose thirteen merchants
and twelve craftsmen to be on the town council for the ensuing year.]
6 October 1673.
Grantis libertie to William Wood, merchand in Edinburgh, to sell
to any persone in toune he pleases eight butis of seck or therby, with some
botle glasses and window and drinking glasses, for quhilk libertie he is to
pay twa hundreth markis Scotis, to be equallie divydit betwixt the merchandis and craftis hospitallis, conforme to the offer made therof be James
Fairie in his name.
8 October 1673.
Dean of gild, etc.
[Office-bearers for the ensuing year chosen as follows:—John Cauldwall, dean
of guild; Patrick Bryce, deacon convener; John Findlay, visitor of maltmen;
John Brysoune, treasurer; John Braidie, water bailie; Robert M'Cuir, bailie of
Gorbals; William Hutchesoune, visitor of gardeners.]
11 October 1673.
Master of wark.
[Thomas Bogle continued master of work for ensuing year.]
Breid, candle, and tallow.
[The wheat loaf weighing 14 oz. to be sold for 12 d.; tallow, 41 s. 4 d. the
stone; candle, 48 s. the stone.]
Compt baillies fynes.
The last yeares baillies made compt of their fynes quhilkis wer all
spent and dystribut wpon poor persones, except fyftie markis given to
Robert Andersoune, son to Robert Andersoune, smith, to put him to ane
Whytfoord coffie hous.
In ansuer to the supplicatioune given in befor them be Collonell
Walter Whytfoord, craving libertie to sett up within this burgh for
making, selling and topping of coffie therin, they have given and grantit,
and heirby gives and grantis libertie to him to sett up to sell, top and
vent coffie within the samyne burgh, for the space of nyntine yeares nixt
after the dait heirof; and that, during that space, no uther stranger sall
have that libertie and priviledge, provyding alwayes, as it is heirby provyded, that he sall set up for the effect forsaid within the space of four
monethis nixt after this day and dait. (fn. 4)
26 October 1673.
Warrand, Hie Kirk.
Ordaines Donald M'Gilcreist to have ane warrand for the sowme of
thrie hundreth fyfty ane pundis xiiij s. deburst be him for leid to the Hie
Kirk for theiking pairt therof.
Candlehoussis and workhoussis for fleshouris and utheris.
It being presentit to the proveist, baillies and counsell, that sundrie
of the fleshouris wer desyrous to tak several peices of the Candlerig to
build houssis on, after rysing of the counsell, they having past to the
grund therof and ther sightit and considered therupon, they appoyntit
the dean of gild and his bretherin to meit with them, or ony utheris
theranent, and to measor of to them such partes as they pleased, and to sett
doune the fewdewtys sall be payable yearly therfor, and to report.
In ansuer to the desyre of them that intendis to build a soparie, (fn. 5) and
craves libertie therfor for building houssis, yairdis and pertinents, on the
end of the land rig bocht fra Mr. William Wilsoune on the north end
therof, foiragainst Johne Hoomes hous builded on the Candlerig, the
said magistrates and counsell grantis them that libertie for building the
said houssis for a soaparie, they always living the streit betwixt it and the
said John Hoomes hous als breid as betwixt Allane Dougallis syd wall
and the fleshmercat.
20 December 1673.
Gorballs oarchyaird and hous to be rouped and set.
Appoyntis ane bank to be sent throw the toune on Wednesday nixt,
desyring all persones who intendis to tak the Gorball oarchyaird and
hous, belonging to the toune, to come to the tolbuith on Tuesday nixt,
come eight dayes, quher the same is to be rouped, and who bids mast
therfor sall get the same set to them, on sufficient securitie.
Appoyntis the deane of gild and deacon conveiner to sight the how way at Suans yet, quhilk John Andersoune craves to be altered, and to