I. EXCERPTS FROM MS. J. OF STATUTES IN THEIR EARLIEST EXTANT FORMS. (fn. 1)

EXTRACT NO. 1.

Constitucio Henrici, Decani, (fn. 2) nondum approbata, de statu personatuum et Canonicorum.

Vacante Decanatu, fratres qui comode possunt vocari ex novi juris possessione per litteras Capituli ad diem certum vocantur, ut veniant, si voluerint, electione Decani interesse, licet ex antiqua consuetudine Ecclesie nunquam ad providendum et eligendum Decanum vocati et expectati fuerint alii quam residentes usque ad tempus Concilii Lateranensis (fn. 3) quod dominus Innocencius celebravit. Hanc tamen vocacionem precedunt denunciacio mortis Decani facienda Episcopo, et sic vocaciones subsequenter; nec intererit Episcopus tractatibus premissis, sed electioni facte, cum laudibus publicate et sibi presentate, assensum prebere tenetur, nisi justum quid et sufficiens pretendere possit et docere propter quod ad regimen vocatus vel ipsum vocantes sua debeant provisione fraudari. Cum igitur fuerit electio Decani per fratres et litteras Capituli presentata et acceptata ab ipso per litteras Episcopi, vel per consensum ipsius, si presens fuerit, vel Ecclesie vicinus, remittatur ad Capitulum installandus. Littere autem dirigende singulis fratribus traduntur in choro suis Vicariis, ut eas dominis suis transmittant. Et alio modo non vocantur fratres absentes pro quocunque negocio communiter tractando.

Decanus installatus juret in Capitulo quod residebit in Ecclesia, et quod jura et libertates Ecclesie tuebitur, et quod approbatas et approbandas Ecclesie consuetudines servabit et faciet observari. Item, quod bona et possessiones Ecclesie inventas conservabit, et alienata pro viribus suis revocabit. Ipse eciam Decanus facit obedienciam domino Episcopo, et eam se promittit servaturum in canonicis mandatis.

In eadem sunt triginta prebende, quatuor Archidiaconatus, Thesauraria, Cancellaria, Cantaria, quas confert Episcopus.

Hii triginta Canonici tractant Ecclesie negocia et secreta; eligunt Episcopum et Decanum.

Nullus debet obtinere Personatum vel Archidiaconatum nisi sit Canonicus de numero dictorum triginta. Residentes in Ecclesia Canonici ipsius secreta interiora et exteriora negocia tractant et ordinant: aliis non expectatis nisi sit arduum valde.

Item, Dominus Episcopus confert unam liberacionem panis et cervisie in Ecclesia ad opus scriptoris pro libris Ecclesie scribendis. (fn. 4)

Item, preficit altari Sancti Michaelis unum Capellanum de provisione E. (fn. 5) Episcopi pro fidelibus ministrantem.

Item, Episcopus preficit Custodem fabrice et Penitenciarium et Capellanum sue Capelle proprie.

Item, dominus Presul confert areas in cimiterio beati Pauli Canonicis ut viderit expedire, illis areis et domibus exceptis que certis personis et prebendis sunt assignate, que omnes domus et aree vacantes sunt in custodia Decani.

Item, dominus Presul omnes quos beneficiat in prebendis, dignitatibus, altaribus, domibus, et areis, mittit ad Decanum et Capitulum cum litteris suis instituendos, excepto Capellano Capelle sue. Duo altaria de beatis martyribus Thoma et Dyonisio super testudines occidentalis Ecclesie nune vacant, de quibus Episcopus deberet ordinare. Dominus Presul majoribus festivitatibus anni, scilicet, Natale, Pascha, et die Cene, et die Paraceves, et duobus festis beati Pauli, si valet, interesse tenetur et ministrare in officio nocturno et diurno, et in capite jejunii similiter pro penitentibus.

Reliquis omnibus dupplicibus festis ministrat Decanus in cujuscumque ebdomada occurrat, si potest, vel alii committit vice sua explendum. Idem eciam installat installandos sub presencia fratrum qui resident, vel eorum qui commode possunt adesse.

Investit prebendis suis, et recipit ab eis suo nomine et Capituli juramenta ad que tenentur: de consuetis et necessariis observacionibus instruit et informat.

Tradita sibi Regula conversandi cum fratribus in libro per Decanum ad anime refectionem, traditur ei subsequenter panis Sancti Pauli, suppositus libro, ad sustentacionem corporalem: postmodum ducitur in chorum a Decano et installatur. Deinde reducitur in Capitulum et locus ei assignatur. Stans postmodum coram Decano, tactis sacrosanctis et inspectis, si sit sacerdos, jurat quod extune erit fidelis Ecclesie et quod ejus jura tuebitur; quod obediens erit Decano et Capitulo in canonicis mandatis; et quod approbatas et approbandas Ecclesie consuetudines observabit. Item, quod secreta Capituli nulli revelabit: et sic per ordinem a Decano, et postmodum a reliquis fratribus a dextris Decani, deinde ab aliis a parte sinistra, recipitur ad osculum.

Igitur receptus in osculo Canonicus a singulis exterior sedeat in ordine ad jussum Decani vel fratrum progressurus extra Capitulum, vel ad ostium cum fuerit necesse pro negociis, et negociorum procuratoribus introducendis qui pre foribus frequenter expectant. Hunc eciam ordinem in processionibus observabit suos priores precedens, donec alius et secundus ab ipso ex eadem parte prebenda investitus modo supradicto: et conferat prioratum. Hic tamen ordo in majoribus personis qui personatus et prebendas obtinent in Ecclesia non servatur, quum ipsi, cum fuerint personatibus investiti, in Choro, Capitulo, et processionibus, secundum personatuum ordines loca certa possidebunt.

Episcopo quippe nulla persona vel Canonicus racione personatus vel prebende ad juramentum tenetur, Archidiaconis exceptis.

Item, Decanus fratres suos admissos, si delinquant, premonitos arbitrio fratrum, corrigit, et punit, si delicta penas requirant. Reliquos omnes de Choro corripit et corrigit, cum fuerit necesse. Minoribus clericis gradus inferioris Cancellario, si resideat, relictis ad puniendum pro commissis. Idem Decanus clericos fratrum suorum residencium suis dominis committit ex curialitate corrigendos, nisi fuerint excessus graviores pro quibus debeant a Choro emitti. Omnibus enim preest ordinaria potestate et immediata, quod ei intranti et transeunti Chorum et Capitulum omnes assurgunt. Item, in tabula scribuntur nominibus dignitatum, Dominus presul, et Decanus tantum ubique.

Cancellarius (fn. 6) autem solus nomine dignitatis in dupplicibus festis tantum in sexta leccione. Reliqui omnes propriis nominibus designantur ubique in Tabula.

Solus sequitur processionem Decanus in medio partis posterioris. Et, si presens sit dominus Episcopus, a dextris erit ipsius, Archidiaconus autem London in sinistra ipsius, in sollempnibus processionibus, cum fuerit insignitus Episcopus. In ministerio altaris vespertino et nocturno Sacerdos Ebdomadarius subministrat Decano, sollempnibus diebus ab una parte Episcopi altare turrificantis; et eciam si fuerit absens Episcopus.

Decanus eciam expectabitur in pulsacionibus glassicorum in vesperis et matutinis eo quod officium ei incumbit sollempnium dierum.

EXTRACT NO. 2.

De Residencia Canonicorum.

Tempore igitur domini Willielmi, (fn. 7) London Episcopi, inter fratres undecim tunc residentes in Ecclesia beati Pauli provisum fuit, quod omnes Canonici, tam novi residentes quam veteres, postquam fuerint statutis temporibus professi se moraturos in Ecclesia et resideantur, de omnibus proventibus tempore sue residencie eque percipient, sive presentes personaliter, sive absentes fuerint, per tempora licita et constituta, exceptis beneficiis et pitanciis que secundum distinctionem testatorum et donatorum inter presentes tantum debent distribui.

Verum quum ex tam liberali et larga provisione ceperunt quidam fratres se frequencius absentare festivis temporibus, quibus Ecclesie labores graviores esse consueverant, et residencium expensas oportuit esse largiores, ne pares fierent, sic absentes personaliter presentibus quibus in labore parificari nolebant et expensis, statutum fuit per Robertum, Decanum, (fn. 8) et fratres multos, qui propter hec et alia convenerant in Capitulo, quod oblaciones (fn. 9) processionum in Pentecostes et aliis temporibus et diebus festivis, inter presentes tantum residentes distribui deberent, ut qui portarent onus et comodum reportarent, sumpto ad hoc exemplo temporis et constitucionis antique, que residentibus et presentibus in Ecclesia terdenos solidos in Natali, et octonos in ebdomada Pasche de Camera largitur, et non aliis qualitercumque per licitum tempus absentibus.

Et quia contencio inter fratres residentes in Ecclesia beati Pauli de firmis tradendis cum vacarent, et de decimis que sunt in dominico Canonicorum, diu duraverat, usque ad tempus F. (fn. 10) Episcopi, quibusdam opinantibus quod ordo veniencium ad novam residenciam in hujusmodi tradicionibus firmarum (fn. 11) deberet observari, aliis, e contra, asserentibus eo quod discreciores et melius meritos in regimine et custodia talium dicerent preferendos, demum electi sunt de communi consensu H. (fn. 12) Decanus, P. (fn. 13) London, R. (fn. 14) Middelsex, Archidiaconi, Robertus precentor, (fn. 15) Magister Willielmus de Lichefeld, (fn. 16) ut contencionibus premissis finem imponerent, et materiam scandali resecarent. Qui veteris Statuti consilio ducti sic ordinarunt: ut nullus de cetero Canonicus ad residenciam faciendam admittatur, donec finitus fuerit annus sui predecessoris cui proximo succedit. Quia si Canonicus substitutus ante completum annum sui predecessoris moriatur, nichil sibi poterit de fructibus ejusdem prebende vendicare. Adjectum est premissis, quod nulli novo residenti ante completum sue residencie annum firma tradatur, quum si residenciam suam modo debito non compleret; in causa refusionis sive restitucionis essent omnes proventus quos communis bursa sibi ministrasset, paucis exceptis, ut in veteri statuto repperitur.

Completa quidem residencia sua laudabiliter si ulterius eo morante et residente firma quevis vacaverit, et sit homo industrius, de cujus fide et discrecione fratribus possit evidenter constare, secundum sue residencie ordinem in firma vacante prefertur aliis de quorum probitate non constiterit; addito moderato firme vacanti cremento, quod Decanus et Capitulum juxta melioracionem in firma facta taxabunt, donec onus conveniens et tolerabile singulis firmis imponatur. Ad hec ordinatum est, ut cum maneria vacant mortuis firmariis ubi decime sunt in dominico Canonicorum, decime firmario remaneant cum suo et separato onere firme.

Excipiuntur ab hac observacione decime de Willesdon, et de Sancto Pancracio, que non continentur in aliquo manerio Capituli.

EXTRACT NO. 3.

De recessu ab Ecclesia.

Tempore quodam post Werram, (fn. 17) tempore Roberti, Decani, (fn. 18) quia de licenciali recessu vel non licenciali per tempus breve fuerat dubitatum, dubium illud fratres omnes enodarunt, statuentes ut si quisquam inportunitate quavis, aut aeris infirmitatis vel tedio molestatur, ad locum vel loca vicina preter licenciam Decani recedat, unde possit ad Capitulum sequentis diei facile reverti, revocatus vel non vocatus: taliter absens per biduum dampno nulli vel pene subjacebit, dum tamen recedens nec petere licenciam ex contemptu dimittat, nec ex consuetudine fraudulenta se absentet.

De oblacionibus ad Episcopum pertinentibus.

Cum estivo quodam tempore negociatores in nundinis de Hoylande suis negociacionibus insisterent, ac ibidem civis quidam London Willielmus, filius Alicie, diem claudens extremum London fuisset per amicorum manus ad patrum suorum sepulturam delatus, Ewstachius (fn. 19) London Episcopus, cum processione Ecclesie sue, funeri occurrens exequias celebravit et officium in altari majori (fn. 20) pro defuncto, presente ante majus altare in Choro Johanne de Sancto Laurencio, tunc Canonico, Capellano et Ebdomadario septimane illius. Cumque ad oblaciones misse illius pro honore defuncti plurimi de civitate convenirent, Capellani Episcopi ejusdem oblaciones quasi sibi debitas vendicantes, favente sibi Episcopo detinebant. Johannes vero de Sancto Laurencio, tanquam Ebdomadarius, pro se et comministris eas ut de jure sibi competentes restitui postulabat. Sicque durante aliquamdiu inter Episcopum et Ebdomadarium contencione de premissis, coram Decano et Capitulo utraque parte judicium Capituli super hiis requirente, negocium quievit hoc fine. Asserebant seniores, et aliorum in hoc sentencia convenit, quod in diebus Natalis Dominice, Pasche, Ascensionis, Pentecostes, in festis eciam beati Pauli et beati Erkenwaldi, in die Cene, in quibus, si quomodo potest, Episcopus personaliter in Ecclesia sua ex debito ministrare tenetur, oblaciones ad manum suam provenientes preter licenciam Ebdomadariorum largiri potest, sccundum arbitrium sue voluntatis. Reliquis vero temporibus et diebus sive in exequiis defunctorum ministret in altari majori et oblaciones recipiat, Ebdomadariis non prejudicat presencia Episcopi; sicque ex decreto Capituli restitute sunt oblaciones memorate Johanni, Ebdomadario, et ministris septimane illius.

Hii interfuerunt R. (fn. 21) Decanus, R. (fn. 22) Archidiaconus Colcestrie, H. (fn. 23) Cancellarius, R. de Wigorn., R. de Bisac, W. de Purle, Maur. de Herla, T. de Storteford, W. filius Roberti, Alex. (fn. 24) archidiaconus Salop., J. Bel, J. de sancto Laurencio sacerdos, et W. archidiaconus London. diaconus, Ebdomadarii obvenciones petitas obtinuerunt.

De statu et correccione Vicariorum

Cum Vicarii Canonicorum de stipendiorum exilitate quererentur, eo quod tres denarii de deno denario singulis diebus dominicis in manus Camerarii ad communes negociorum expensas remanserunt, quos sibi petebant instanter assignari, firmiter promittentes quod, facta tali ampliacione stipendiorum, Chorum de cetero optime frequentarent, qui pro negociis suis, sicut et Minores Canonici chorum male frequentantes, fuerant multociens verbis et comminacionibus graviter correpti, licet non correcti: ad convincendam ipsorum Vicariorum maliciam per G. (fn. 25) Decanum et fratres tunc presentes, concessus fuit integre denus denarius, adjecta pena contra male ministrantes sicut inferius continetur. Fuit igitur sic in primis ordinatum contra Minores Prebendatos qui fuerunt diucius circa officium chori nimis negligents, ut qui in chori frequentacione inventi fuerint negligentes, si se de cetero ex consuetudine subtraxerint a matutinis, per subtraccionem unius bolle de liberacione sua constituta puniantur: (fn. 26) similiter puniendi si in hora prima, missa majori, et vesperis, absentes fuerint a choro: vel si scripti in tabula non expleverint quod tabula sibi dictaverit agendum, per se vel per socios, et sine defectu. Et hoc circa sanos et bene valentes volumus observari, minutis ex licencia superioris, et infirmis seu ex licencia et superioris precepto absentibus exceptis, ita tamen quod absencie ipsorum, vel impotencie, seu minuciones illis nuncientur qui tabulam scribunt. Nec propter premissa credant aliquatenus se a frequentacione aliquarum horarum canonicarum absolutos, licet illis commodius possunt et alternatim interesse et vicissim absentes, ut domesticis negociis suis intendant, computatis in tallia sua per Custodem Bracini subtraccionibus hujusmodi, cuilibet eorum qui sic fuerit puniendus. Super absenciis vero talium et delictis credi volumus testimonio duorum, qui ab utraque parte Chori Ecclesiam bene frequentantes, et jurati, aliorum absencias fideliter describant et defectus. Circa Vicarios autem sic duximus ordinandum, ut preter pitancias defunctorum et alia beneficia ipsis bene meritis assignata, integrum de cetero denum denarium percipiant in ebdomada, ne de brevitate stipendiorum conquerantur: quibus singulis si modo supradicto furerint absentes ab horis principalibus, pro qualibet absencia ipsorum denarium amittant. Eosdem autem si reliquum officium Ecclesie insolenter frequentare contempserint, per ampliorem subtraccionem, si denus denarius non sufficiat, cum fiet distribucio proventuum Ecclesie de Bumsted decrevimus puniendos, fidem habituri super negligenciis ipsorum, hiis quos ad hec scrutanda deputamus.

Statuimus insuper, ut cum faciende pro defunctis occurrerint in missis matutinalibus pitancie inter clericos Chori in officio defunctorum presentes non fiat prius distribucio, quam officium misse plene consumetur.

Idem autem Vicarii eidem legi circa observacionem absenciarum, minucionum, et similium subjaceant, que contra Minores Canonicos est edita, suis stipendiis, et aliis sibi constitutis pitanciis, ac proventibus, dum bene servierint, contenti.

De Residencia in Ecclesia S. Pauli.

Tempore quodam cum Magister Walterus Niger, (fn. 27) Canonicus Sancti Pauli London, residenciam suam facere primo cepisset in Vigilia Sancti Michaelis, et infra dies Natalicios proximo sequentes London concessisset in fata, ac eisdem diebus Nataliciis Magister Hugo de London, Archidiaconus Colcestrie, (fn. 28) non residens, alibi diem clausisset extremum, dominus Rogerus, (fn. 29) tunc Episcopus prebendam dicti H., nec residentis nec Stacionarii, Magistro W. de Sancte Marie Ecclesia, Stacionario et residenti, commutavit. Prebendam autem W. Nigri residentis, Magistro Ricardo de Wendovere, tam Residenti quam Stacionario, commutavit. Veniente autem tempore compotorum in termino Cinerum tam Magister R. de Wendovere qui residenti defuncto successit, quam Magister W. de Sancte Marie Ecclesia qui successit non residenti plenam distribucionem proventuum Camere sibi vendicavit in compoto; pretendebat enim uterque communa Camere sibi debebatur ut residenti, tam post commutacionem prebendarum suarum, quam ante cujus commutacionis racione neutri quicquam debuit deperire, in exemplum ponentes dominum Galfridum, (fn. 30) Decanum, qui residens, per similem commutacionem Willielmo, filio Roberti, in residencia sua defuncto, in prebenda de Totenhale successerat, continuam distribucionem proventuum Camere percipiens per annum, quem Willielmus defunctus habuerat utilem in distribucione premissa. Ad hec eciam quod quamvis ex consuetudine antiqua fuissent Canonici defuncti ab omni honere Ecclesie et contribucione liberi et immunes per annum sequentem post obitum, petebant tamen preter solitum dicti W. et R. scribi in tabula ad ebdomadarum labores in ordine reliquorum, licet communam panis et cervisie defuncto debitam non percipient, tempus sue stacionis ante commutacionem prebendarum: tempori subsequenti non interruptum continuare intentes, ut distribuciones Camere percipient ad plenum quod et G. Decanum fecisse dicebant, ut est supra memoratum. Ad que fuit a reliquis fratribus responsum, quod invalidum erat exemplum quod pretendebat de Decano, qui cum specialius ceteris jura Ecclesic teneretur tueri, tam contra proprium juramentum suum, quam in prejudicium fratrum suorum, qui tempore compotorum multis fuerant occupacionibus detenti, presumpserat recipere quod non debebat, salva pace sua quod instanter petebant emendari. Reducentes ei ad memoriam R. (fn. 31) de Diceto cui successerat in decanatu Alardus, (fn. 32) et Robertus de Watford (fn. 33) cui successerat Martinus (fn. 34) in decanatu, quorum nullus predecessori suo in annuis proventibus camere qui defuncto debebantur, prejudicium paravit: quia si secus factum fuisset, inconveniens sequeretur grave et Ecclesie dampnosum, quod scilicet, defuncto percipiente communam sibi debitam et successore similiter, Canonicorum numerus augeretur, et tam defuncto residenti, quam vivis residentibus, porciones eis debite negarentur.

Durante igitur aliquamdiu controversia, cum in arbitrium fratrum super diffinicione premissarum consensum fuisset, ipsi ex diversitate facti diversum jus colligentes decreverunt:—quod Magister W. de Sancte Marie Ecclesia, qui Stacionarius et residens non-residenti successit, tollerabiliter poterat ad participium commune de Camera, et similium in quibus defunctus non sensit lesionem admitti, dummodo Ecclesie deserviret tempore vicis sue ut residens, salvo jure defuncti in aliis proventibus. At contra, Magistro Ricardo, qui licet residens et residenti defuncto successit cui annue commune participium debebatur, participium distribucionis denegarunt. In parte alia per Decanum petentes emendari quod per ipsum qui residens, et residenti successerat, fuerat presumptum, terciam partem injuste perceptorum tam sibi quam Magistro Ricardo remittentes.

EXTRACT No. 4. (fn. 35)

Nominacio Richardi de Swinefield, Archidiaconi London, ut regat in Scolis nostris et apud nos predicet.

In Dei nomine, Amen. Nos Thomas de Ingaldesthorp, Decanus (fn. 36) Ecclesie Sancti Pauli London, Rogerus de la Lec, (fn. 37) Archidiaconus Essex, Radulphus de Baudak, (fn. 38) Archidiaconus Middlesex, Robertus de Drayton, Thesaurarius, Radulphus de Ivinghoe, Cancellarius, Simon de Stanbrig, Johannes de Sancta Maria, Reginaldus de Brandon, Johannes de Luca, nune Stacionarii, et Robertus de Stowe, novam inchoans residenciam; considerantes inter cetera que ad salutem spectant populi Christiani, tam sacre pagine doctrinam pro clero quam verbi Dei pabulum communiter pro omnibus permaxime fore necessaria, perpendentes insuper intime consideracionis acie nos apud clerum et populum civitatis minoris fuisse reputacionis, eorundemque civitatensium affeccionem, beneficenciam pariter, et frequenciam erga predictam Ecclesiam nostram et nos jampridem vehemencius tepuisse, pro eo quod doctorem in sacra pagina et predicatorem ydoneum ex nobismct ipsis non habuimus, set in hiis cum nostri honoris et fame dispendio coacti sumus aliena suffragia mendicare: provida deliberacione venerabili fratri nostro Magistro Richard de Swinefeld, Archidiacono London, theologo probatissimo et predicatori gracioso, concessimus unanimi voluntate ut ab hoc festo Sancti Michaelis anno gracie M^o cc^o octogesimo primo usque ad annum completum in theologia congruis temporibus regat actualiter in scolis nostris et apud nos predicet, cum fuerit oportunum, et per hoc tanquam utillime gerens et procurans Ecclesie negocia a continua prosecucione Chori in nocturno et diurno officio relevetur. Dum tamen singulis diebus quibus legitime non fucrit excusatus, intersit alicui horarum canonicarum subscriptarum, quam optare voluerit, videlicet, matutinis, vel prime, seu misse majori, vel vesperis, seu completorio, salvis minucionibus suis, et aliis diebus quibus juxta Regulam nostram a frequentacione Chori poterit totaliter excusari; proviso tamen quod hujusmodi minuciones vel vacaciones captet cum quanto minori incommodo poterit auditorum. Et quod juxta datam sibi a Deo prudenciam, utilitatem et honorem Ecclesie, pro ipsius lapsu reparando, studeat pro viribus procurare. Post annum vero sue residencie in prenotata forma completum inter perpetuos Stacionarios connumerabitur, proventus omnimodos ipsum racione residencie contingentes cum acciderint sicut ceteri Stacionarii secundum cursum sue residencie percepturus, et extune vel per continuacionem leccionum suarum in sacra pagina, et officium predicandi temporibus oportunis, vel si maluerit juxta morem antiquum et consuetum prout alii communiter faciunt, suam poterit facere stacionem. Protestamur tamen quod per hujusmodi graciam seu rigoris mitigacionem statuto nostro seu consuetudini Ecclesie de antiquo modo residendi non intendimus derogare, nec quod alias trahatur statutum hujusmodi in exemplum, tamen hac vice duntaxat, quasi urgente necessitate et manifesta utilitate Ecclesie suadente, excepta persona et tempore, hanc graciam vel moderacionem fecerimus; quibus alias cessantibus, cessare debebit effectus, statuto nostro predicto seu consuetudine de antiquo modo residendi in suo robore permanente. Et ne presens statutum possit in dubium revocari, hanc forman et limitacionem in nostro Registro ad futuram memoriam fecimus annotari.

EXTRACT No. 5.

Nota de xx marcis quas Camerarius debet reddere.

Memorandum, quod anno Domini M^occ^olx^oiij^o, Magistro G. de ffering, Decano, presente in compoto facto die Sabbati proxima post Assensionem Domini, dominus Willielmus Facetus, Canonicus Sancti Pauli London, donavit communitati ad utilitatem viginti marcas ad provisiones faciendas Camere necessarias temporibus oportunis; tali condicione adjecta, quod quicunque fuerit Camerarius, in compoto anni finali, habeat predictas viginti marcas integras vel providencias ad valenciam viginti marcarum. Et hoc observetur quociens Camerarius ab officio suo fuerit ammovendus vel moriatur.

Vespere et Completorium sine intervallo dicende.

Memorandum, quod anno supradicto, facta fuit convocacio omnium Canonicorum London Ecclesie, ad tractandum de diversis Ecclesie negociis. Et convenientibus in Capitulo die Lune proxima post festum Apostolorum Petri et Pauli omnibus qui voluerunt et potuerunt interesse, ut melius et plenius in Ecclesia Sancti Pauli divinum ab omnibus vel a majori parte celebretur officium, unanimi consensu et voluntate provisum est et ordinatum, quod tam in estate quam in yeme, vespere et completorium continue et sine intervallo dicantur. Et is officium pro defunctis faciendum fuerit inter vesperas et completorium, fiat de cetero, non obstante aliqua consuetudine aliter obtenta et servata.

De Vicariis.

Item, eodem tempore provisum fuit et ordinatum, quod si aliquis Canonicus decedat, Vicarius ejus infra annum defuncti, si honestus fuerit et ydoneus, nullatenus ammoveatur, set in ordine quem prebenda requirit deserviat, et stipendia sua integraliter percipiat, sicut prius toto anno defuncti. Et si Canonicus substitutus alium Vicarium minus ydoneum post annum presentaverit, nullatenus admittatur, nec prior Vicarius aliquo modo amoveatur, nisi Canonicus novus aliquam justam causam pretendit quare non debeat ipsum habere Vicarium, vel nisi presentatus ab eo sit nota persona, et eque ydoneus, vel magis ydoneus quam alius. Et si executores Canonici defuncti velint habere sacerdotem in Ecclesia ministrantem pro anima defuncti, provideant de persona et de stipendiis ipsius de bonis defuncti, prout viderint expedire.

EXTRACT No. 6.

Bulla que prohibet ne panis et cervisia vendatur nisi Canonicis.

Lucius (fn. 39) Episcopus, servus servorum Dei, dilectis filiis Decano et Capitulo London, Salutem et Apostolicam Benedictionem. Ex injuncto nobis servitutis officio ecclesiarum statui tenemur intendere, et ea que in ipsis enormiter attemptantur provisione apostolica emendare. Sane accepimus quod cum in Ecclesia vestra singuli Canonici a communi Celario victualia cotidiana percipiant, illi qui absentes existunt nichilominus victualia illa percipiunt, que viris et mulieribus et Judeis sepe vendere non verentur, cum ea residentes Canonici justo sint parati precio comparare. Quia ergo fratres qui in Ecclesia ipsa assidue Deo serviunt in hoc merito sunt quibuslibet laicis preponendi, auctoritate presencium inhibemus ne laicis aliquibus victualia ipsa vendendi licencia tribuatur. Si quis autem hoc attemptare presumpserit, tu, fili Decane, ipsum auctoritate nostra, sublato appellacionis diffugio toto, reddas beneficio alienatum. Data Verone iij id. Marcii.

Footnotes