1 July 1575.
Lent money, Dull.
[The bailies and council] efter avisement of my Lord Regenttis Grace
writing send to thame, willing thame to satifie Nicholace Ganysford,
Inglisman, procuratour for Walter Dule, alsua Inglisman, indueller in
Byrsto, in Ingland, according to his Graces commonyng with the baillies
of before, for eschewing of the spulze libellit be the said Dull for his schip
allegit taikin fra him in Lochbrowme in anno 1566, or vtherwise to send
his Grace ansuer that he may provide remeid. Be the quhilk writing,
jugeing his Grace to be angrye, and for eschewing of forther anger, thay
all in ane voce, as of before, ordane James Ros, Jhonn Adamsoun,
James Guthre, and Robert Galbrayth, to evance euery ane of thame the
sowme of xxvi li. [blank] for fulfilling of thair promys maid to my said
Lord Regenttis Grace, satifeing of the said Ganysford, and eschewing
of the said spulze.
9 July 1575.
[The bailies and council] being convenit in the counsalhous, comperit
William Naper of Wrychttis houssis, Nychole Vdder [and others] and
producit the writing vnderwrittin begynnand as followis:—
The petitioun and desyre of the nychtbouris of Edinburgh
quhilkis hes bene wairdyt sen the secund of Februer 1574.
The Petitioun of the nychtbouris impresonyt.
We maist humlie desyir my lord provest, balzes, counsall, and
dekenis, with certane honest men of the toun, to pas to my Lord
Regentis Graice and to desyir his Graice to releiff us off our wairding,
quhilk we have sustenit thir tuentie twa oulkis, and to the effect your
wisdomes may knaw what thingis ar allegit aganis us becauis sum of the
toun makis thame to be ignorant thairof, etc., the sayingis and allegances be
my Lord Regentis Graice is this, as followis:— Item it is spokin and allegit
be his Grace that we sevin only wair the stayiris of the toun to grant his
Graice ane certane quantitie of bulzeoun requerit be his Grace to help to
pay our Souerane Lordis dettis and for the weill off the realme, and reforme
the base cunze, quhairin we did na thing bot anserit and declarit quhow
the toun culd nocht grant the bulzeoun desyrit, according to the commissioun
giwine ws be the counsall, allouit and approuit thairefter, and thairfoir off
guid ressoun this aucht nocht nor suld be imput wnto ws mair nor the
rest of the toun, quhairfoir it appeiris that in this caice your wisdomes
suld procure our libertie; and forder his Graice sayis that in this our
truible we ar sustenit of the commoun guid of [the] toun, quhairin we beseik
your wisdomes to beir leill witnes off the trewithe. Item, that we haid
spokine off his Graice that we haid maid his Graice and we waild mismak
him, quhilk we denye neuir to be thocht be ws, laitt be to spekit, and
desyre your wisdomes neuir to requeist in our fauouris in this caice, bot
rather to requeist our tryell, that in caice we be fundin sic men as to be
blasphemouris of our hie magistrait, we ar nocht wirthie to be in your
wisdomes societie and company.
The baillies and counsale ordanis ane writing to be send to my lord
prouest to be in this toun the morne, for his counsale and help concernyng
the petitionis aboue writtin, and forther ordanis the baillies to convene the
hale honest nychtbouris, merchanttis, dekynnis, and craftismen for thair
counsale siclike to be in the premissis, and to see quhat ordour sall be
taiken with my Lord Regenttis Grace concernyng the iustice air that is to
be haldin with this burgh.
11 July 1575.
The haill nychtbouris being convenit for ansuer gevin to the petitionis
aboue writtin, and the craftismen be James Young and Jhonn Murdow
thair foirspekaris, refusit to haif ony melling with the saidis petitionis, in
so far as the same did concern my Lord Regentis Grace, and the remanent
nychtbouris consentis that the counsall and haill honest men merchantis
travell with his Grace in fauouris of thair nychtbouris presentlie wairdit
in Linglithgu, etc.
26 August 1575.
The baillies and counsall ordanis all sic to be put in waird as hes
nocht payit thair contributioun to the pvre, thair to remane quhill the
samyn be payitt.
7 September 1575.
The baillies and counsall ordanis James Ros, thesaurer, to cause
reparrell and furneis the necessaris to maister James Lowsounis hous,
sic as portellis, syllering of his over chalmer for his study, duris and lokis
thatt wantis; and siclike to put on the greitt yet of the fleschehous.
23 September 1575.
Marioribankis, minister, clerk.
The baillies and counsale vnderstanding the sessioun of the kirk
nocht to be weill seruit be Adam Moscrop, thair clerk, quhairfor thay
ordane ane of the baillies vpoun Thurisday nixt to present vnto thame
Mychaell Marioribankis to be thair clerk, and to serue thame in that office
induring the prouest, baillies, and counsallis willis.